Նոր հասցե` ԵՊԲՀ «Հերացի» ավագ դպրոց

ՀՀ կառավարության ս/թ հուլիսի 4-ի որոշմամբ մեր բուհի հովանավորությանն է հանձնվել Երևանի թիվ 30 ավագ դպրոցը, որն այժմ կոչվում է Երևանի պետական բժշկական համալսարանի «Հերացի» դպրոց: Անմխիթար վիճակում գտնվող կրթօջախում արտաքին բարեկարգման աշխատանքներ են իրականացվել:

Սակայն, որպեսզի այն վերածվի մեր բուհին վայել դպրոցի, դեռևս շատ անելիքներ կան:

Նոր ուսումնական տարվա կապակցությամբ Երևանի Մ. Հերացու անվան պետական բժշկական համալսարանի գիտական աշխատանքների գծով պրոռեկտոր, բժշկական գիտությունների դոկտոր, պրոֆեսոր Միքայել Նարիմանյանը ջերմորեն ողջունելով Երևանի պետական բժշկական համալսարանի «Հերացի» ավագ դպրոցի սաներին, նրանց ուսուցիչներին ու ծնողներին, ասաց.

- Երևանի պետական բժշկական համալսարանի «Հերացի» ավագ դպրոց անունը ոչ միայն պատվաբեր, այլև պարտավորեցնող է: Վստահեցնում եմ, որ առաջիկայում ևս կարվի հնարավոր ամեն ինչ, որպեսզի աշակերտները սովորեն լավ պայմաններում և լիարժեք կրթություն ստանան: 

Պրոռեկտորը շրջեց դասարաններում և զրուցեց բարձր դասարանցիների հետ: Նա տեղեկացրեց, որ աշակերտների համար կկազմակերպվեն բաց դասեր «Քիմիա», «Ֆիզիկա», «Կենսաբանություն» առարկաներից:

Բժիշկ դառնալ ցանկացողներին Մ. Նարիմանյանն ասաց.«Շատ ուրախալի է, որ դուք ընտրել եք դեպի բժշկի կարևոր և բարդ մասնագիտությունը տանող ճանապարհը: Մեր օգնությամբ մոտիկից ծանոթանալով բժշկական գործընթացին` դուք կկարողանաք հստակ կողմնորոշվել»:

Հ.Գ. Մեր իրականության մեջ նորույթ համարվող այս երևույթի նախատիպը կար խորհրդային տարիներին: Բուհերը ունեին ենթաշեֆ դպրոցներ, որտեղ բուհական կոմերիտական կազմակերպության ակտիվիստները դպրոցականների մեջ այն ժամանակ չափազանց կարևորվող` կոմունիստական դաստիարակության տարբեր դրսևորումներով` աշխատանքային, ռազմահայրենասիրական, սպորտային, նրանց դաստիարակում էին: Շեֆությունը վերաբերում էր բարոյական դասիտիարակության` ոգեղեն ոլորտին, նյութական մասնակցությունը դպրոցի գործունեությանը ացառվում էր, քանի որ բուհը նման ֆունկցիա իրականացնելու ո´չ իրավունք ուներ, ո´չ` հնարավորություն: Բոլորի կառավարման բոլոր լծակները պետության ձեռքին էին: Ենթաշեֆ դպրոցներում կազմակեպվող աշխատանքները նպատակաուղղված էին աշակերտների մասնագիտական կողմնորոշմանը: Այսօր շեֆությունը բոլորովին այլ խնդիրներ է լուծում, այն առավել լիարժեք է, քանզի աշակերտների մասնագիտական կողմնորոշումից զատ ստանձնում է նաև վերանորոգման, կահավորման, նախատեսում անգամ տնօրենի և մանկավարժների աշխատավարձի բարձրացում:

Հարցեր, պատասխաններ, մեկնաբանություններ